Elimizdegi densaýlyq saqtaý salasyn damytýdyń 2016-2019 jyldarǵa arnalǵan «Densaýlyq» memlekettik baǵdarlamasynda densaýlyq saqtaý júıesiniń turaqtylyǵy - densaýlyq saqtaýǵa baǵyttalatyn qarajatty ádil bólýdi jáne utymdy paıdalanýdy kózdeıtin tıimdi qarjylandyrý júıesimen baılanysty ekendigi aıtylǵan edi. MÁMS júıesi densaýlyq saqtaýǵa jumsalatyn ósimtal memlekettik jáne jeke shyǵyndardyń saldarynan bolatyn qarjylyq qaterlerdi joıý maqsatynda qoldanylmaq. Búgingi tańda oblys turǵyndaryna MÁMS júıesin túsindirý jumystary belsendi júrgizilýde. Aıta ketsek, 153 nysanda beınerolıkter translásıasy júzege asyrylyp, qoǵamdyq oryndarda syrtqy jarnamalar men aýdıojarnamalar túrindegi aqparattar ornalastyryldy. Atalmysh júıeni túsindirgen 418 280 býklet, 200 000 jol júrý bıletteri men komýnaldyq kásiporyndardyń 1 000 túbirtegi taratyldy. Turǵyndardyń nysanaly aýdıtorıasymen ıaǵnı, jumys berýshilermen, qyzmetkerlermen, memlekettik qyzmetshilermen, jeke sot oryndaýshylary alqasynyń jáne advokattar alqasynyń, sharýa qojalyqtarynyń, jeke kásipkerlerdiń qyzmetkerlerimen kezdesýler uıymdastyryldy. Basqosýlar barysynda MÁMS júıesiniń tıimdiligi men jumys isteıtin halyqtyń, jumys berýshiler men ózin-ózi jumyspen qamtyǵan halyqtyń mindetti saqtandyrý tólemderiniń negizinde qurylatyndyǵy aıtyldy. Sonymen birge halyqtyń áleýmettik qorǵalmaǵan toptary (balalar, zeınetkerler, eńbek etýge qabiletsiz azamattar men jumyssyzdar) úshin saqtandyrý jarnalaryn respýblıkalyq búdjet qarajatynan memleket tóleıtindigi jetkizildi. Bul júıeniń mańyzdylyǵy týraly oblystyq departament jáne aýdandyq mekeme mamandary arnaıy oqytyldy. «Nur Otan» HDP oblystyq fılıaly men halyqqa qyzmet kórsetý ortalyǵynyń fılıaldarynda turǵyndarǵa keńes berýler uıymdastyrylýda. Sondaı-aq óńirde mindetti áleýmettik medısınalyq saqtandyrýdy engizý máseleleri boıynsha Biryńǵaı Call ortalyǵy jumys jasap tur. Oblystyq densaýlyq saqtaý basqarmasynyń baspasóz qyzmetinen kelip túsken málimet boıynsha, óńirde 2500-ge jýyq kezdesýler uıymdastyrylyp, oǵan 357 972 turǵyn qatysqan. Aldaǵy ýaqytta osy baǵyttaǵy jumystar júıeli jalǵasyn bolady.
Gúlim AQAP,
Batys Qazaqstan oblysy
